hayat hai ki musalsal safar ka aalam hai
har ek saans men vahshi ghazal ka ram hai
jahan azal se ghaTa-Top zulmaten hain muhit
vahan bhi aaj farozan nigah-e-adam hai
unhin ke ḳhuun se damkega kal ruḳh-e-giti
hayat jin ke liye aaj saghar-e-sam hai
usi ki aanch se pighlega zindagi ka jumud
jo soz aaj ba-zahir dilon men kam kam hai
jahan-e-soz hai mere ḳhunuk taranon men
main vo sharar huun jis par rida-e-shabnam hai
na jaane jaag uThe ‘shad’ kab nasib-e-jahan
bahut dinon se mizaj-e-hayat barham hai
Leave a Reply