baat kahne ke liye baat bana.i na ga.i
ham se barat farebon ki saja.i na ga.i
aaj bhi daar ke taḳhte se sada aati hai
haq ki avaz sitamgar se daba.i na ga.i
dost karte hain hasad is liye teri tasvir
ma-siva dil ke kahin aur saja.i na ga.i
gham ki tasvir banane ko main jab bhi baiTha
un ki muskan ubhar aa.i bana.i na ga.i
na.i tahzib ke ḳhakon ko sanvara ham ne
ham se aḳhlaq ki tasvir bana.i na ga.i
jaane kya sujhi miri qabr par aa kar un se
gul chaḌha.e na ga.e sham.a jala.i na ga.i
main to baat aa.i ga.i kar ke chala aaya tha
ho ga.i baat para.i vo daba.i na ga.i
us ne hangamon se bahla.i hai apni duniya
vaqt se amn ki shahna.i baja.i na ga.i
‘charḳh’ dekhe jo javani ke ubharte jalve
zindagi apni gunahon se bacha.i na ga.i
Leave a Reply