Dil Pe Jo Guzri Koi Kya Jaane

Josh Malsiani

dil pe jo guzri koi kya jaane

ye to ham janen ya ḳhuda jaane

ḳhaak jhelega vo musibat-e-ishq

jo laga kar na phir bujha jaane

tu hi apna maqam janta hai

ik zulum-o-juhul kya jaane

kya kare arz-e-mudda.a vo bashar

ibtida ko jo intiha jaane

bada-noshon ka hashr kya hoga

mujh bala-nosh ki bala jaane

baat rindi ki mujh ko aati hai

parsa.i ki parsa jaane

tujh ko apni ḳhabar nahin ai ‘josh’

to ḳhuda.i ke raaz kya jaane