na-jane kitne lahje aur kitne rang badlega
vo apne haq men hi saare usul-e-jang badlega
ḳhala men tairte maskan riha.ish ke liye honge
ye mustaqbil mira tahzib-e-ḳhisht-o-sang badlega
dar-o-divar kya janen khula-pan asmanon ka
kushada-dil vahi hoga jo zehan-e-tang badlega
baḌha.ega vo apne qad ko banson par khaḌe ho kar
kabhi tariḳh badlega kabhi farhang badlega
amir-e-shahr ne ham ko sagan-e-shahr samjha hai
vo apna kaam rokega na apna Dhang badlega
bahut chhoTa sahi ye dil magar ‘anjum’ ye mumkin hai
tavazun ishq ka ab to yahi pasang badlega
Leave a Reply