Aish-O-Ishrat Sab Sahi Ye Dam Nahin To Kuchh Nahin

aish-o-ishrat sab sahi ye dam nahin to kuchh nahin

ek duniya ho to kya jab ham nahin to kuchh nahin

surmagin ankhon men ashk-e-gham nahin to kuchh nahin

dast-e-rangin se mira matam nahin to kuchh nahin

subh ko shab ke satane ka gila-shikva abas

jab pareshan gesu-e-barham nahin to kuchh nahin

ishq se thoda bahut to hai har insan ko lagao

dil men kuchh kuchh dard kuchh kuchh gham nahin to kuchh nahin

is kamar par is nazakat par ye sidhi chaal kyuun

bal nahin to kuchh nahin kuchh kham nahin to kuchh nahin

us ki shokhi ne use ai dil chhupa rakkha kahan

hashr men vo fitna-e-alam nahin to kuchh nahin

milne valon ka baham mil baithna bhi lutf hai

jamghate shab ko sar-e-zamzam nahin to kuchh nahin

us ki raunaq aur hai us ka asar kuchh aur hai

un ki mahfil men mira matam nahin to kuchh nahin

pyare pyare achchhe achchhe munh se haan kah de kabhi

tere sadqe ye tiri har-dam nahin to kuchh nahin

baal khole tum ne to kya chudiyan todin to kya

mere marne ka jo dil se gham nahin to kuchh nahin

baat jis ki thi gai saaqi vo us ke dam ke saath

jam-e-jam ho bhi to kya jab ham nahin to kuchh nahin

phuut kar rona nahin to phuut hi jaaen ‘riyaz’

kaam ke jab dida-e-pur-nam nahin to kuchh nahin

Leave a Comment