sub.h ko aa.e ho nikle shaam ke
jaao bhi ab tum mire kis kaam ke
hatha-pa.i se yahi matlab bhi tha
koi munh chume kala.i thaam ke
tum agar chaho to kuchh mushkil nahin
Dhang sau hain nama-o-paigham ke
chheḌ vaa.iz har ghaḌi achchhi nahin
rind bhi hain ek apne naam ke
qahr Dha.egi asiron ki taḌap
aur bhi uljhenge halqe daam ke
mohtasib chun lene de ik ik mujhe
dil ke TukḌe hain ye TukḌe jaam ke
lakhon dhaḌke ibtida-e-ishq men
dhyan hain aghaz men anjam ke
mai ka fatva to sahi qaazi se luun
Tok kar raste men daman thaam ke
duur daur-e-mohtasib hai aj-kal
ab kahan vo daur-daure jaam ke
naam jab us ka zaban par aa gaya
rah gaya naseh kaleja thaam ke
duur se naale mire sun kar kaha
aa ga.e dushman mire aram ke
haa.e vo ab pyaar ki baten kahan
ab to laale hain mujhe dushnam ke
vo laga.en qahqahe sun kar ‘hafiz’
aap naale kijiye dil thaam ke
Leave a Reply