dukh apna chhupane men zara vaqt lagega
ab us ko bhulane men zara vaqt lagega
tu ne jo pukara to palaT a.ungi vapas
haan lauT ke aane men zara vaqt lagega
likha tha baḌe chaav se jis naam ko dil par
vo naam miTane men zara vaqt lagega
deta hai kisi aur ko tarjih vo mujh par
us ko ye jatane men zara vaqt lagega
jis shaḳh pe phal-phul nahin aa.e hain ab tak
vo shaḳh jhukane men zara vaqt lagega
sab ranj-o-alam milne chale aa.e hain mujh se
mahfil ko sajane men zara vaqt lagega
main dekh bhi sakti huun kisi aur ko tujh sang
ye dard kamane men zara vaqt lagega
jo aag ‘sadaf’ hijr ne hai dil men laga.i
vo aag bujhane men zara vaqt lagega
Leave a Reply