Neelam Malik
pahle jin sanchon se ham katrate hain
vaqt ke saath inhi men Dhalte jaate hain
ek hi zardi kyuun mausam par chha.i hai
saton rang palaT kar kyuun nahin aate hain
ham se to bas ek masafat saath nibha
kaun hain jo umron ki qasmen khate hain
din bhar us divar se lag ke ro.enge
shab bhar jis ko dil ka haal sunate hain
mustaqbil talab ki jis ke paani men
andeshon ke kaale hans nahate hain
sub.h savere ankhon se ruḳhsat ho kar
kaun nagar ko ḳhvab bhaTakne jaate hain
Leave a Reply