Pahle Jin Sanchon Se Hum Katraate Hain

pahle jin sāñchoñ se ham katrāte haiñ

vaqt ke saath inhī meñ Dhalte jaate haiñ

ek hī zardī kyuuñ mausam par chhā.ī hai

sātoñ rañg palaT kar kyuuñ nahīñ aate haiñ

ham se to bas ek masāfat saath nibhā

kaun haiñ jo umroñ kī qasmeñ khāte haiñ

din bhar us dīvār se lag ke ro.eñge

shab bhar jis ko dil kā haal sunāte haiñ

mustaqbil tālāb ki jis ke paanī meñ

andeshoñ ke kaale hañs nahāte haiñ

sub.h savere āñkhoñ se ruḳhsat ho kar

kaun nagar ko ḳhvāb bhaTakne jaate haiñ

Leave a Comment