Kaif-E-Gham Lutf-E-Alam Yaad Aaya

Poet

kaif-e-gham lutf-e-alam yaad aaya

kis ka andaz-e-karam yaad aaya

jada-e-zist ke har moḌ pe kyon

kakul-e-yar ka ḳham yaad aaya

kar gaya gharq-e-nadamat dil ko

jab tiri aankh ka nam yaad aaya

na gaya phir tire aane ka ḳhayal

tera jaana bhi na kam yaad aaya

paaya zulmat se tajalli ka shu.ur

dair men ja ke haram yaad aaya

khul gaya vus.at-e-daman ka bharam

kyon tira dast-e-karam yaad aaya

aa gaya nam-e-ḳhuda lab pe mire

jab vo patthar ka sanam yaad aaya

ji men aaya hi tha jiine ka ḳhayal

yak-ba-yak shahr-e-adam yaad aaya

fikr hai ḳhuld-ba-daman ‘at.har’

kucha-e-rashk-e-iram yaad aaya