tu mere saath hatheli uTha nikal aa.e
koi dua na sahi bad-dua nikal aa.e
kabhi-kabhar use chuum len to mumkin hai
hamare munh se bhi shukr-e-ḳhuda nikal aa.e
ḳhabar ki taak men baiThe hue to chahenge
kisi tarah se koi vaqi.a nikal aa.e
yahi to dukh hai qabila bhi ḳhandan tha ek
magar mizaj hi apne juda nikal aa.e
mare huon ki talashi men ho bhi sakta hai
kisi ki jeb se us ka pata nikal aa.e
uTha raha huun yahi soch kar ziyan pe ziyan
kisi ki ḳhair kisi ka bhala nikal aa.e
mujhe ḳhabar hai ki ye log lauT ja.enge
agar yahan se koi rasta nikal aa.e
naya safar ho mubarak magar karoge kya
vahan bhi aisi hi ab-o-hava nikal aa.e
nikal raha huun main us dil se is tarah ‘sahir’
ki jaise kaaT ke qaidi saza nikal aa.e
Leave a Reply