gul miri janib uTha kar phenkiye
ba.ad men chahen to nashtar phenkiye
atish-e-ulfat na bujhne pa.egi
laakh ab is par samundar phenkiye
ye nahin kahti safa.i ki muhim
ghar ke kachre ko saḌak par phenkiye
paap ganga men baha dijega aur
nekiyan dariya men ja kar phenkiye
is tarah samjhauta ho sakta nahin
aap pahle apna ḳhanjar phenkiye
aag siine men na lag jaa.e kahin
dard ki cigarette bujha kar phenkiye
dijiye roTi bhi izzat se use
yuun nahin samt-e-qalandar phenkiye
naach kar dikhla.ega insan bhi
us ke aage thoḌi chilllar phenkiye
choT ‘anjum’ aap ko lag ja.egi
asman par yuun na patthar phenkiye
Leave a Reply