bichhad ke donon ke zehnon pe bojh padta hai
rahen jo saath to ankhon pe bojh padta hai
phalon ke hone se shakhen faqat lachakti hain
phalon ke girne se shakhon pe bojh padta hai
tumhare zikr ki aadat hui hai aisi inhen
kuchh aur bolen to honton pe bojh padta hai
bas ek chehre ko sapne men dekhne ke liye
tamam umr ki nindon pe bojh padta hai
‘azim’ duur ke rishton ko duur rakkha kar
vagarna paas ke rishton pe bojh padta hai
Leave a Reply