Biswin Sadi Ka Insan

mujhe sameto

main reza reza bikhar raha huun

na jaane main badh raha huun

ya apne hi ghubar-e-safar men har pal utar raha huun

na jaane main ji raha huun

ya apne hi tarashe hue nae raston ki tanhaiyon men har lahza mar raha huun

main ek patthar sahi magar har saval ka baz-gasht ban kar javab dunga

mujhe pukaro mujhe sada do

main ek sahra sahi magar mujh pe ghir ke barso

mujhe mahakne ka valvala do

main ik samundar sahi magar aftab ki tarah mujh pe chamko

mujhe bulandi ki samt udne ka hausla do

mujhe na todo ki main gul-e-tar sahi

magar os ke bajae lahu men tar huun

mujhe na maaro

main zindagi ke jamal aur gahma-gahmiyon ka payambar huun

mujhe bachao ki main zamin huun

karodon karodon ki kaenat-e-basit men sirf main hi huun

jo khuda ka ghar huun

Leave a Comment