phuul khushbu un pe udti titliyon ki khair ho
sab ke angan men chahakti betiyon ki khair ho
jitne mithe lahje hain sab giit honge ek din
mithe lahjon se mahakti boliyon ki khair ho
chunriyon men khvab le kar chal padi hain betiyan
in parae des jaati Doliyon ki khair ho
barishon ke shor men kyuun jagte hain dard bhi
sehn-e-jan men raqs karti badliyon ki khair ho
rakht-e-dil ko thaam kar vo aa gai hain ret par
khvahishon ki khair ho un pagliyon ki khair ho
ab kabutar fakhtaen ja chuki hain gaanv se
ai khudavand ped ki aur bastiyon ki khair ho
raat hai ‘babar’ khadi sailab ka bhi zor hai
sahilon ki manjhiyon ki kashtiyon ki khair ho