Poet
kaif-e-hayat tere siva kuchh nahin raha
teri qasam hai tujh se juda kuchh nahin raha
vallah sab ruten hain pareshan tire baghair
vallah mausamon ka maza kuchh nahin raha
tufan sahilon ko uḌate chale ga.e
kaise kahun ki kuchh bhi raha kuchh nahin raha
afsos mabadon men ḳhuda bechte hain log
ab ma.ani-e-saza-o-jaza kuchh nahin raha
ham mai-kashon pe kufr ke fatve diye ga.e
ahl-e-ḳhuda ko ḳhauf-e-ḳhuda kuchh nahin raha
ham to vafa-parast rahenge tamam umr
maana ki un ko pas-e-vafa kuchh nahin raha
‘kaifi’ main kis tarah se vo manzar bayan karun
main ne jo ro ke un se kaha kuchh nahin raha
Leave a Reply