purane ghar ka jo sidha sa ek naqsha the
ye log vo hain jo pahle kabhi farishta the
tumhare husn-e-nazar ne bana diya manzil
kabhi na jis pe chala koi ham vo rasta the
dayar-e-dushman-e-jan se bahut sahara mila
tumhare shahar se nikle to dil shikasta the
baḌe maze men rahe maslahat ke shahzade
jo sach ki raah men the un ke haal ḳhasta the
tumhen bulandi-e-qamat pe tha ghurur magar
the vo to zarf men a.ala jo qad men pasta the
jo ishtihar bane phir rahe the ghairat ka
amir-e-shahr ke aage vo dast-basta the
yahi hain hazrat-e-‘aqib’ jo parsa hain bahut
yahi to ba.is-e-afsana-e-guzishta the
Leave a Reply