rafta rafta dil-e-be-tab Thahar ja.ega
rafta rafta tiri nazron ka asar ja.ega
daad be-dad ki is men koi taḳhsis nahin
naqsh-e-hasti men koi rang to bhar ja.ega
aap agar ma.il-e-tajdid-e-sitam ho jaa.en
rang-e-ta.alim-e-vafa aur nikhar ja.ega
arz-e-tishna pe baras abr-e-ravan khul ke baras
baat rah ja.egi ye vaqt guzar ja.ega
dhuup aur chhanv musallam magar apni had men
vaqt paband nahin hai ki Thahar ja.ega
raushni men hai charaghon ke tale tariki
ham samajhte the ki mahaul sanvar ja.ega
ishq to apni jagah kaif-e-musalsal hai ‘uruj’
nashsha-e-bada nahin hai jo utar ja.ega
Leave a Reply