pakḌi na thi kitab ki ustad ho ga.e
haath aa ga.i ghulail to sayyad ho ga.e
le ham ne khol di hain ye ankhen shu.ur ki
le ham tire fareb se azad ho ga.e
tu ne ai zindagi jo sikha.e hamen sabaq
asani se hamen vo sabaq yaad ho ga.e
duniya se Dar ga.e jo vo duniya men gum hue
karte rahe jo ishq vo farhad ho ga.e
yaden tiri hamen liye pahunchi thiin jis jagah
ham phir usi jazire pe abad ho ga.e
maslub ho ga.e jinhen matlab tha ishq se
daulat ki thi talab jinhen shaddad ho ga.e
ya.ani ki ishq chhoḌ ke sab kuchh kiya gaya
kya kya tariqe ishq ke ijad ho ga.e
ta.amir yuun hue the ki hairan the mahal
ujḌe bhi yuun ki surat-e-baghdad ho ga.e
tum ko bhula na pa.egi tariḳh ab kabhi
‘aqib’ tum ab havala-e-buniyad ho ga.e
Leave a Reply