Obaidur Rahman
ek muddat se jo siine men basa hai kya hai
karb-e-ehsas hai ya karb-e-ana hai kya hai
daur-e-hazir men har ik shaḳhs hai kyuun sahma hua
dil men jo ḳhauf hai vo ḳhauf-e-fana hai kya hai
mujh ko is lafz ka mafhum bata do yaaro
dosti naam hai jis ka vo jafa hai kya hai
baat matlab ki kahun us se magar pahle zara
ye to ma.alum ho vo ḳhush hai ḳhafa hai kya hai
is qadar ranj-o-alam itne masa.ib tauba
zindagi silsila-e-ah-o-buka hai kya hai
jo giraftar hua is men ulajhta hi gaya
zulf-e-janan bhi koi dam-e-bala hai kya hai
kitni hi baar ye chaha ki zara dekhun to
us ki ankhon men jo ik naam likha hai kya hai
Leave a Reply