main apne azaab likh rahi thi
zaḳhmon ka hisab likh rahi thi
phulon ki zaban ki sha.era thi
kanTon se gulab likh rahi thi
us peḌ ke khokhle tane par
ik umr ke ḳhvab likh rahi thi
ankhon se saval paḌh rahi thi
palkon se javab likh rahi thi
har buund shikasta bam-o-dar par
barish ka itaab likh rahi thi
ik nasl ke ḳhvab ke lahu se
ik nasl ke ḳhvab likh rahi thi
phulon men Dhali hui ye laḌki
patthar pe kitab likh rahi thi
Leave a Reply