Poet
agar har chiiz men us ne asar rakkha hua hai
to phir ab tak mujhe kyuun be-hunar rakkha hua hai
ta.alluq zindagi se muḳhtasar rakkha hua hai
ki shanon par nahin neze pe sar rakha hua hai
zamane se abhi tak puchhte hain us ki baten
use ham ne abhi tak be-ḳhabar rakkha hua hai
ab aisi be-samar saa.at men us ki yaad kaisi
ye dukh achchhe dinon ki aas par rakkha hua hai
nikalna chahta hai vus.at-e-sahra men vahshi
baḌe jatanon se dil ko bandh kar rakkha hua hai
sada deta hai roz-o-shab koi aisa jazira
jahan mere bhi hisse ka samar rakkha hua hai
na jaane kaun si manzil pe bujh jaa.en miri ankhen
so main ne ik ik ham-safar rakkha hua hai
Leave a Reply