ḳhvab Thahra sar-e-manzil na tah-e-bam kabhi
is musafir ne uThaya nahin aram kabhi
shab-ba-ḳhair us ne kaha tha ki sitare larze
ham na bhulenge juda.i ka vo hangam kabhi
sar-kashi apni hui kam na umiden TuTin
mujh se kuchh ḳhush na gaya mausam-e-alam kabhi
ham se avaron ki sohbat men hai vo lutf ki bas
do-ghaḌi mil to sahi gardish-e-ayyam kabhi
ai saba main bhi tha ashufta-saron men yakta
puchhna dilli ki galiyon se mira naam kabhi
Leave a Reply