jab zara tez hava hoti hai
kaisi sunsan faza hoti hai
ham ne dekhe hain vo sannate bhi
jab har ik saans sada hoti hai
dil ka ye haal hua tere baad
jaise viran sara hoti hai
rona aata hai hamen bhi lekin
is men tauhin-e-vafa hoti hai
munh-andhere kabhi uth kar dekho
kya tar o taaza hava hoti hai
ajnabi dhyan ki har mauj ke saath
kis qadar tez hava hoti hai
gham ke be-nur guzargahon men
ik kiran zauq-faza hoti hai
gham-gusar-e-safar-e-rah-e-vafa
mizha-e-abla-pa hoti hai
gulshan-e-fikr ki munh-band kali
shab-e-mahtab men va hoti hai
jab nikalti hai nigar-e-shab-e-gul
munh pe shabnam ki rida hoti hai
hadsa hai ki khizan se pahle
bu-e-gul gul se juda hoti hai
ik naya daur janam leta hai
ek tahzib fana hoti hai
jab koi gham nahin hota ‘nasir’
bekali dil ki siva hoti hai
Leave a Reply