Zakiya Shaikh Meena
darogh-go yahan paikar sabhi ra.unat ke
jahan men anqa hue aa.ine sadaqat ke
paḌa hai kaal tire shahr men to kuuch karen
talash karte hain gauhar kahin mohabbat ke
ḳhirad ki baat kahan manta dil-e-nadan
bikhar rahe hon dhanak rang jabki ulfat ke
baḌe hi pyaar se chhute hain dil ke zaḳhmon ko
vo nok-e-ḳhar hi hain gul nahin hain chahat ke
hain lafz-e-kohna mohabbat ḳhulus rasm-e-vafa
na.e hain silsile tansiḳh bughz-o-nafrat ke
masham-e-jan men mahakti hai vasl ki ḳhushbu
hain yaad tujh ko shab-o-roz apni qurbat ke
ḳhirad ki sunte kahan hain junun-e-ishq men log
ye dard sahte hain ‘mina’ ji kis qayamat ke
Leave a Reply