Sarfraz Nawaz
laḌkhaḌata huun kabhi ḳhud hi sambhal jaata huun
main bhi raston ke hi bartao men Dhal jaata huun
minnaten mujh se kiya karte hain dariya aa kar
aur main pyaas chhupa kar ke nikal jaata huun
din virasat men mujhe raushni de jaata hai
vo diya huun ki sar-e-sham hi jal jaata huun
chaak pe aa ke nahin chalti hai marzi meri
ye bahut hai jo kisi shakl men Dhal jaata huun
be-sada si kisi avaz ke pichhe pichhe
chalte chalte main bahut duur nikal jaata huun
a.ina roz bharam rakhta hai qaa.em mera
varna ye sach hai main har roz badal jaata huun
aaj mahfil se tiri uTTha huun sha.er ho kar
teri ankhon se liye ek ghazal jaata huun
Leave a Reply