Gham-E-Ulfat Hai Sabab KHalq Mein Ruswai Ka

ġham-e-ulfat hai sabab ḳhalq meñ rusvā.ī kā

naam badnām huā kyoñ shab-e-tanhā.ī kā

TukḌe TukḌe hai jigar aap ke saudā.ī kā

sāmnā aaj bhī hai hashr meñ rusvā.ī kā

maut aatī hai na imkāñ hai shakebā.ī kā

aag lag jaa.e burā ho shab-e-tanhā.ī kā

dil ke TukḌe na karo husn kī zīnat hai yahī

aa.ina TuuTā to kyā lutf ḳhud-ārā.ī kā

paḌ ga.ī ahal-e-qayāmat kī garebāñ pe nazar

chhiḌ gayā hashr meñ qissa mirī rusvā.ī kā

phir kashish ne dar-e-mahbūb kī khīñchā dil ko

phir huā zauq hameñ nāsiya-farsā.ī kā

ghaTtī jaatī hai charāġh-e-dil-e-sozāñ kī ziyā

baḌhtā jaatā hai añdherā shab-e-tanhā.ī kā

kyoñ na insān ho mushtāq-e-tilism-e-duniyā

dil bahaltā hai tamāshe se tamāshā.ī kā

chhā ga.ī zulmat-e-ġham dil pe ḳhudā ḳhair kare

aa gayā chāñd gahan meñ shab-e-tanhā.ī kā

hālat-e-naza.a hai dam toḌ rahā hai bīmār

nā-tavānī meñ ye aalam hai tavānā.ī kā

kar chuke aap hamārā dil-e-murda zinda

saath iisā ke gayā daur masīhā.ī kā

aañkh meñ maut kī phir jaatī hai sūrat ab tak

ba-ḳhudā naam burā hai shab-e-tanhā.ī kā

ḳhair itnā to huā mashq-e-jafā se hāsil

aa gayā tum ko salīqa sitam-ārā.ī kā

aaj hai kal se ġhanīmat ye sunā jaatā hai

dūr-az-hāl mizāj aap ke saudā.ī kā

le gayā husn-e-ḳhudā-dād butoñ kā ‘mas.ūd’

maqdarat sabr kī imkān shakebā.ī kā

Leave a Comment