us sitamgar se jo mila hoga
jaan se haath dho chuka hoga
ishq men tere ham jo kuchh dekha
na kisi ne kabhi suna hoga
aah qasid tu ab talak na phira
dil dhaḌakta hai kya hua hoga
tu hi ankhon men tu hi hai dil men
kaun yaan aur tujh siva hoga
ai miyan gul to khil chuke pa kabhu
ghuncha-e-dil mira bhi va hoga
dekh tu faal men ki vo mujh se
na milega milega kya hoga
hai yaqin mujh ko tujh sitamgar se
dil kisi ka agar laga hoga
nala-o-ah karte hi karte
ek din yuun hi mar gaya hoga
koi hoga ki dekh use ‘bedar’
dil o diin le ke tuj raha hoga
Leave a Reply