bahut jabin-o-ruḳh-o-lab bahut qad-o-gesu
talab hai shart-e-sukun ke hazar-ha pahlu
jo be-ḳhudi hai salamat to mil hi ja.ega
bara-e-fursat-e-andesha yaar ka zaanu
hazar dasht-e-bala halqa-e-asar men hain
mira junun hai ki chashm-e-ghazal ka jaadu
ye raaz khol diya teri kam-nigahi ne
sukun ki ek nazar dard ke bahut pahlu
saba hazar kare bu-e-gul ki amezish
na dab sakegi tire jism-e-naz ki ḳhushbu
ik iztirab-e-hasin hai fishar-e-tangi-e-mai
kanar-e-shauq men tu hai ki daam men aahu
bahut hai ahl-e-basirat ko ek jalva bhi
vafur-e-tishna-labi ho agar to ḳham hai subu
junun aur ahl-e-junun ka vo qaht hai ‘tabish’
uTha na dasht se phir koi na.ara-e-yahu
Leave a Reply