‘jamal’ ab to yahi rah gaya pata us ka
bhali si shakl thi achchha sa naam tha us ka
phir ek saaya dar-o-bam par utar aaya
dil-o-nigah men phir zikr chhiḌ gaya us ka
kise ḳhabar thi ki ye din bhi dekhna hoga
ab e’tibar bhi dil ko nahin raha us ka
jo mere zikr par ab qahqahe lagata hai
bichhaḌte vaqt koi haal dekhta us ka
mujhe tabah kiya aur sab ki nazron men
vo be-qusur raha ye kamal tha us ka
so kis se kijiye zikr-e-nazakat-e-ḳhad-o-ḳhal
koi mila hi nahin surat-ashna us ka
jo saaya saaya shab-o-roz mere saath raha
gali gali men pata puchhta phira us ka
‘jamal’ us ne to Thani thi umr-bhar ke liye
ye chaar roz men kya haal ho gaya us ka
Leave a Reply