Wali Aasi
mil bhi jaate hain to katra ke nikal jaate hain
haa.e mausam ki tarah dost badal jaate hain
ham abhi tak hain giraftar-e-mohabbat yaaro
Thokaren kha ke suna tha ki sambhal jaate hain
vo kabhi apni jafa par na hua sharminda
ham samajhte rahe patthar bhi pighal jaate hain
umr-bhar jin ki vafaon pe bharosa kiije
vaqt paḌne pe vahi log badal jaate hain
is taghaful pe ye aalam ki har ik mahfil se
vo bhi gaate hue ‘vali’ ki ghazal jaate hain
Leave a Reply