dekh aae ham bhi do din rah ke dehli ki bahar
hukm-e-hakim se hua tha ijtama-e-intishar
aadmi aur janvar aur ghar muzayyan aur machine
phuul aur sabza chamak aur raushni rail aur taar
kerosene aur barq aur petroleum aur tarpin
motor aur airplane aur jamghate aur eqtidar
mashriqi patlun men thi khidmat-guzari ki umang
maghribi shaklon se shan-e-khud-pasandi ashkar
shaukat-o-iqbal ke markaz huzur-e-emperor
zinat-o-daulat ki devi empress ali-tabar
bahr-e-hasti le raha tha be-daregh angdaiyan
thames ki amvaj jamuna se hui thiin ham-kanar
inqilab-e-dahr ke rangin naqshe pesh the
thi pae-ahl-e-basirat bagh-e-ibrat men bahar
zarre viranon se uthte the tamasha dekhne
chashm-e-hairat ban gai thi gardish-e-lail-o-nahar
jaame se bahar nigah-e-naz-e-fattahan-e-hind
hadd-e-qanuni ke andar honorablon ki qatar
kharch ka total dilon men chutkiyan leta hua
fikr-e-zati men khayal-e-qaum ghaeb fil-mazar
davaten inaam speachen qavaid fauj camp
izzaten khushiyan ummiden ehtiyaten e’tibar
pesh-rau shahi thi phir his-highness phir ahl-e-jah
baad is ke shaikh sahab un ke pichhe khaksar
Leave a Reply