jo saare ham-safar ik baar harz-e-jan kar len
to jis zamin pe qadam rakkhen asman kar len
ishara karti hain maujen ki aaega tufan
chalo ham apne iradon ko badban kar len
paron ko jod ke udne ka shauq hai jin ko
unhen batao ki mahfuz ashiyan kar len
jo qatl tu ne kiya tha bana ke mansuba
tire sitam ko badhaen to dastan kar len
dahakte shoalon pe chalne ka shauq hai jin ko
ruton ki aag men vo hausle javan kar len
ye un se kah do agar imtihan ki zid hai
samundaron ki tarah dil ko be-karan kar len
har ek buund ka lenge hisab ham ‘alvi’
hamare khuun se dil ko vo shadman kar len
Leave a Reply