tumhare lahje men jo garmi o halavat hai
use bhala sa koi naam do vafa ki jagah
ghanim-e-nur ka hamla kaho andheron par
dayar-e-dard men aamad kaho masiha ki
ravan-davan hue khushbu ke qafile har-su
khala-e-subh men gunji sahar ki shahnai
ye ek kohra saa, ye dhund si jo chhai hai
is iltihab men, is surmagin ujale men
siva tumhare mujhe kuchh nazar nahin aata
hayat naam hai yadon kaa, talkh aur shirin
bhala kisi ne kabhi rang o bu ko pakda hai
shafaq ko qaid men rakkha saba ko band kiya
har ek lamha gurezan hai, jaise dushman hai
na tum milogi na main, ham bhi donon lamhe hain
vo lamhe ja ke jo vapas kabhi nahin aate!