ye daur mujh se khirad ka vaqar mange hai
dil ab bhi shauq ke lail-o-nahar mange hai
jahan men kis ko gavara hui hai fikr ki dhuup
har ik, koi shajar-e-saya-dar mange hai
zaban lala-o-gul men basi hui hai magar
zamana lafz men khanjar ki dhaar mange hai
akele-pan ka ye ehsas ham-nafas ki talash
badhi hui jo ye talkhi hai pyaar mange hai
ye aadmi mire khvabon ka saath kya deta
haqiqaton se jo akasr farar mange hai
ab in men apna lahu ho ki koi shokh kiran
varaq jo saada hai naqsh-o-nigar mange hai
hua kahan abhi sadiyon ke jabr se azad
khudai par jo bashar ikhtiyar mange hai
bhikariyon ko yahan bhiik kaun deta hai
hai sada-lauh jo duniya se pyaar mange hai
vo dida-var jise pahchanti nahin mahfil
tiri nazar se faqat e’tibar mange hai