Be-Sabab Ho Ke Be-Qarar Aaya

Hammad Niyazi

be-sabab ho ke be-qarar aaya

mere pichhe mira ghubar aaya

chand yadon ka shor tha mujh men

main use qabr men utaar aaya

us ko dekha aur us ke baad mujhe

apni hairat pe e’tibar aaya

bhuul baiTha hai rang-e-gul mira dil

partav-e-gul pe itna pyaar aaya

ek duniya ko chahta tha vo

ek duniya men us pe vaar aaya

saans leti thi koi hairani

main jise lafz men utaar aaya

kuchh na aaya hamare kaase men

aur aaya to intizar aaya

kab mujhe us ne iḳhtiyar diya

kab mujhe ḳhud pe iḳhtiyar aaya

bar-e-vahshat koi uThata kya

so digar baar dil pe baar aaya