kisi ki yaden miri chashm-e-tar men rahti hain
ye kashtiyan hain kuchh aisi bhanvar men rahti hain
zamana ho gaya ninden nahin nasib huiin
hamari ḳhvahishen zehni safar men rahti hain
kahin se pankh milen aur asman chhu len
kuchh aisi hasraten har ik bashar men rahti hain
ye soti jagti rahti hain us ki yadon men
hamari anḳhen usi ke asar men rahti hain
safar hayat ka pur-lutf hai magar ai dost
musibaten bhi usi rahguzar men rahti hain
hava men tairti phirti hain kitni afvahen
dikha.i deti nahin aur ḳhabar men rahti hain
Leave a Reply