Basir Sultan Kazmi
karna hai gar mujhe shikar la koi jaal muḳhtalif
shatir hai tu agar to ab chal koi chaal muḳhtalif
tere ye saare sho.abde mere liye nahin na.e
kar ke dikha kabhi mujhe koi kamal muḳhtalif
lagte hain ye jo kamyab hain jaise aab par habab
pesh-e-nigah unhen na rakh DhunD misal muḳhtalif
jin ko milin bulandiyan dekhin unhon ne pastiyan
hoti hai har dafa magar vaj.h-e-zaval muḳhtalif
tu ne kahi suni-suna.i mujh se suni-suna.i sun
chahe agar na.e javab puchh saval muḳhtalif
meri bahar aur ḳhizan mere lahu men hai nihan
mirriḳh-o-arz se mire hain mah-o-sal muḳhtalif
aisi chali dam-e-sahar shaam talak kiya nihal
bad-e-saba se thi bahut mauj-e-ḳhayal muḳhtalif
Leave a Reply