kis shahr na shohra hua nadani-e-dil ka
kis par na khula raaz pareshani-e-dil ka
aao karen mahfil pe zar-e-zakhm numayan
charcha hai bahut be-sar-o-samani-e-dil ka
dekh aaen chalo ku-e-nigaran ka kharaba
shayad koi mahram mile virani-e-dil ka
puchho to udhar tir-fagan kaun hai yaaro
saunpa tha jise kaam nigahbani-e-dil ka
dekho to kidhar aaj rukh-e-bad-e-saba hai
kis rah se payam aaya hai zindani-e-dil ka
utre the kabhi ‘faiz’ vo aina-e-dil men
aalam hai vahi aaj bhi hairani-e-dil ka
Leave a Reply