is se pahle ki koi aur haTa de mujh ko
apne pahlu se kahin duur biTha de mujh ko
main suḳhan-fahm kisi vasl ka muhtaj nahin
chandni raat hai ik sher suna de mujh ko
ḳhud-kushi karne ke mausam nahin aate har roz
zindagi ab koi rasta na dikha de mujh ko
ek ye zaḳhm hi kaafi hai mere jiine ko
charagar Thiik na hone ki dava de mujh ko
yuun to suraj huun magar fikr lagi rahti hai
vo charaghon ke bharam men na bujha de mujh ko
tujh ko malum nahin ishq kise kahte hain
apne siine pe nahin dil men jagah de mujh ko
har na.e shaḳhs pe khul jaane ki aadat ‘mohan’
dene vaale se kaho thoḌi ana de mujh ko
Leave a Reply