Ajay Sahaab
taaza hava ke vaste khiḌki na ban saka
de duun kisi ko chhanv vo badli na ban saka
beTa basa bides men daulat ke dher par
lekin vo buḌhe baap ki laThi na ban saka
shair ka vasta baḌa gahra hai bhuuk se
us ka kalam aaj bhi roTi na ban saka
kyuun kar karun umiid tu mujh sa banega dost
jaisa main chahta huun vo ḳhud bhi na ban saka
ka.abe se lauT kar vahi sud-o-ziyan ki fikr
haj kar liya magar kabhi haaji na ban saka
rah ke bhi duur sun sake abba ki khansiyan
beTa kabhi bhi baap ki beTi na ban saka
ḳhud ki kami ko chhoḌ kar ghairon pe hi uThe
main aaj tak ‘sahab’ vo ungli na ban saka
Leave a Reply