jis din se ham junun ke hain daman lage hue
daman ki ja yahan hain gareban lage hue
allah re qaid-ḳhana-e-hasti ki dam ke saath
har ik qadam pe lakhon hain zindan lage hue
roya main dekh marqad-e-majnun ko dhaaḌ maar
the ja-e-gul daraḳht-e-mughilan lage hue
baare chhuTe asir-e-bala us gali men aaj
hain tud-ha-e-ganj-e-shahidan lage hue
yaran-e-pesh-rau zara Thahro ki jyuun jaras
ham pichhe pichhe aate hain nalan lage hue
rakh soch kar qadam miri vaadi men gard-e-bad
paanv se apne hain ye bayaban lage hue
koi to mere naseh-e-dana se ye kaho
dil chhuTte hain baton men nadan lage hue
kya din the vo bhi ‘lutf’ ki rahte the misl-e-zulf
kanon se us ke ham se pareshan lage hue
Leave a Reply