KHayali Shakl Par Tera Guman Hota to Kya Hota

Syed Masood Hasan Masood

ḳhayali shakl par tera guman hota to kya hota

tasavvur mahv-e-sair-e-la-makan hota to kya hota

pise jaate hain dil raftar se aaj ek aalam ke

jo ai pir-e-falak tu naujavan hota to kya hota

tumhari dosti vaj.h-e-sukun-e-qalb-e-muztar thi

agar dushman hamara asman hota to kya hota

ḳhata kya ki zaban par mudda.a-e-dil agar laaya

ḳhamoshi se jo iz.har-e-bayan hota to kya hota

vo mera dard-e-dil sun sun ke mujh par muskurate hain

ḳhuda na-karda gar main be-zaban hota to kya hota

ye maana dosti ko mar ke sabit kar diya ham ne

kisi ko gham nasib-e-dushmanan hota to kya hota

shikasta kar chuki thi dil ko aafat na-muradi ki

koi TuuTe makan men mehman hota to kya hota

na khulta hashr tak jo farq hai adna-o-a.ala men

na duur itna zamin se asman hota to kya hota

gulistan men taḌap kar kal giri hai jis jagah bijli

vahin yarab hamara ashiyan hota to kya hota

bachaya shirk se ‘mas.ud’ shan-e-be-niyazi ne

agar vahdat pe kasrat ka guman hota kya hota