vo bujh gaya to andheron ko bhi malal raha
vo ik charagh jo jalne men bhi be-misal raha
kabhi bhula na saka dil-shikastagi apni
juda to jud ke bhi us aaine men baal raha
miri hayat ne hatim bana diya mujh ko
har ik saval ke baad ik naya saval raha
hamesha main ne bhi nakamiyon se kaam liya
tamam-umr mira ‘mir’ jaisa haal raha
tumhare baad kisi se fareb khaya nahin
tumhara mujh se bichhadna bhi nek-fal raha
ghamon ko haavi na hone diya kabhi dil par
shab-e-firaq bhi zikr-e-shab-e-visal raha
kahan haram hai kidhar kaaba hai kidhar rukh hai
namaz-e-ishq men us ka kahan khayal raha
ghazal usi ki thi haavi tamam ghazlon par
vahan bhi raunaq-e-bazm-e-sukhan ‘kamal’ raha
Leave a Reply