Zahid Chaudhry
vo bahr-o-bar men nahin aur na asman men hai
jo raz-e-zist mire shauq-e-be-karan men hai
mujhe qarar ba-juz shauq-e-be-qarar nahin
sukun-e-zist mujhe shoḳhi-e-butan men hai
mujhe qubul nahin aisa raz-e-sar-basta
jo chashm-e-aql se poshida la-makan men hai
miri hayat faqat justuju-e-paiham hai
mira maqam sitaron ke karvan men hai
main asman men sitaron ki sair karta huun
ye kya surur tire sang-e-astan men hai
mire vajud men pinhan hai gauhar-e-yakta
mira vajud nihan bahr-e-be-karan men hai
chaman men jabki nasheman bana chuka huun main
ajab tarah ki chamak chashm-e-asman men hai
mire kalam se aaya hai barg-e-gul pe nikhar
mire nafas ki mahak saare gulistan men hai
vo lutf-e-zist jo hai tund-o-tez tufan men
vo shaḳh-e-gul pe nahin aur na ashiyan men hai
vo soz-o-saz-e-haqiqat se ashna hogi
vo zindagi jo hama-vaqt imtihan men hai
har ek lahza hai ik taaza valvala darkar
ajab tarah ka maza bahr-e-be-karan men hai
vo meri quvvat-e-iman ki ik alamat hai
jo shor-e-hashr bapa bazm-e-dushmanan men hai
Leave a Reply