tire ishara-e-abru ka ehtiram karen
vajud apna sambhalen ki tera kaam karen
javab de to maza bhi mile savalon ka
vo aa.ina hai to phir kis tarah kalam karen
thakan se aankh jhapakne lagi hai sona hai
tujhe junun-e-safar aḳhiri salam karen
bahut se kaam hain duniya men aadmi ke liye
kisi ke vaste kyuun zindagi haram karen
ibadaton ke maze ḳhaas log hi luTen
rivaj-e-shirk-e-mohabbat jahan men aam karen
ḳhata ke hote zaman-o-makan ki qaid ghalat
na.i faza na.i duniya ka intizam karen
laven charaghon ki ankhon men gum huiin shayad
kahin se raushni laa.en to fikr-e-sham karen
jidhar bhi ja.iye shorish-zada ilaqa hai
kahin bhi ja-e-aman hai jahan qayam karen
tamam qatra-e-shabnam hon qumqume jaise
nashat rang savere ka ehtiram karen
bujhe charaghon men kaise ho nuur ki tarsil
na ho ye fikr to phir intizar-e-sham karen
har aadmi ko yahan da.ava-e-ḳhuda.i hai
akeli jaan hai kis kis ka ehtiram karen
tumhen hai sar ki zarurat hamen shahadat ki
tum apna kaam sambhalo ham apna kaam karen
na fan-shanas hai koi na sher-fahm koi
kise kalam suna.en kahan kalam karen
tumhara gham bhi hai ai ‘ramz’ apne gham jaisa
mata.a-e-mushtarka ye ghazal ke naam karen
Leave a Reply