main bhi huzur-e-yar bahut der tak raha
ankhon men phir ḳhumar bahut der tak raha
kal shaam mere qatl ki tariḳh thi magar
dushman ka intizar bahut der tak raha
ab le chala hai dasht men mera junun mujhe
is jin pe iḳhtiyar bahut der tak raha
vo inkishaf-e-zat ka lamha tha khul gaya
shayad darun-e-ghar bahut der tak raha
ab dekhte ho koi sahara mile tumhen
main bhi to ashk-bar bahut der tak raha
tum maslahat kaho ya munafiq kaho mujhe
dil men magar ghubar bahut der tak raha
main ḳhaak asman ki bulandi ko dekhta
apnon pe e’tibar bahut der tak raha
ilzam-e-ḳhud-sari bhi to sabit kiya gaya
main jab ki ḳhaksar bahut der tak raha
‘sahil’ miri bala se mira hashr hoga kya
duniya men ba-vaqar bahut der tak raha
Leave a Reply