Wo Qaza Ke Ranj Mein Jaan Den Ki Namaz Jin Ki Qaza Hui

vo qazā ke rañj meñ jaan deñ ki namāz jin kī qazā huī

tire mast-e-bāda-e-shauq ne na kabhī paḌhī na adā huī

tire daur-daura-e-ishq meñ mirī ek rañg se kaT ga.ī

na sitam huā na karam huā na jafā huī na vafā huī

mujhe ġhair-e-ijz-o-niyāz ne tire dar pe jā ke jhukā diyā

na to koī ahd likhā gayā na to koī rasm adā huī

mirā dil bhī thā mirī jaañ bhī thī na vahī rahā na yahī rahī

mujhe kyā ḳhabar ki vo kyā huā mujhe kyā ḳhabar ki ye kyā huī

mirī umr ‘muztar’-e-ḳhasta-dil kaTī ranj-o-dard-o-firāq meñ

na kisī se merī davā huī na davā se mujh ko shifā huī

Leave a Comment