shauq ne ishrat ka saman kar diya
dil ko mahv-e-ru-e-janan kar diya
tu ne ai jam.iyat-e-dil ki havas
aur bhi mujh ko pareshan kar diya
vaah re zaḳhm-e-mohabbat ki ḳhalish
jis ko dil ne rahat-e-jan kar diya
ḳhud-numa.i ḳhud-faroshi ho ga.i
aap ne apne ko arzan kar diya
un ke daman tak na pahuncha dast-e-shauq
us ko masruf-e-gareban kar diya
bazm men jab ghair par Daali nazar
aap ne mujh par bhi ehsan kar diya
kuchh baḌha kar main ne bahr-e-sharh-e-gham
chaak ko unvan-e-daman kar diya
jhuk ga.i aḳhir haya se un ki aankh
shauq ne mujh ko pashiman kar diya
pa-e-but par main ne do sajde kiye
kufr ko bhi juzv-e-iman kar diya
use ḳhayal-e-laila-e-majnun-navaz
tu ne sahra ko gulistan kar diya
ho ke zaa.il quvvat-e-ehsas ne
mushkilon ko meri asan kar diya
dil nahin jaata tha su-e-rah-e-dair
kaise kafir ko musalman kar diya
tu ne ‘vahshat’ kyuun ḳhilaf-e-rasm-e-ishq
dard ko rusva-e-darman kar diya
Leave a Reply