Dattatriya Kaifi
ho ke ashiq jaan marne se chura.e kis liye
mard-e-maidan jo na ho maidan men aa.e kis liye
jo dil-o-iman na diin nazr un buton ko dekh kar
ya-ḳhuda vo log is duniya men aa.e kis liye
hai ye andaz-e-haya aur tarz-e-tamkin kyuun nahin
jo na hove chor vo ankhen chura.e kis liye
dekhiye kis jannati ke aaj khulte hain nasib
tegh kyuun tole hain ye chille chaḌha.e kis liye
ungliyan apne par uThvani na hon manzur to
vo kisi ko aam mahfil se uTha.e kis liye
us ke pech-o-ḳham se jite-ji nikalna hai muhal
hazrat-e-‘kaifi’ tum is kuche men aa.e kis liye
Leave a Reply