taras raha huun adam armida ḳhushbu ko
kahan se DhunD ke la.un ramida aahu ko
zahe-nasib ki taskin de raha hai aaj
tumhara husn mire ishq-e-sar-ba-zanu ko
chamak raha hai tiri raah men tiri ḳhatir
hai intizar tira har diye ko jugnu ko
sitam ki ahl-e-mohabbat bhi rah ga.e nakam
samajh na paa.e jamal-e-hazar-pahlu ko
utara umr-e-gurezan ke raste jogi ne
hamare sar se ka.i joginon ke jaadu ko
hazar hiile bahane se ‘krishn-mohan’ ne
shikar-e-shauq kiya hai nigar-e-dil-ju ko
Leave a Reply